តើ AI ជាអ្វី? ហើយវាបានចូលរួមចំណែកអ្វីខ្លះ ដល់វិស័យបច្ចេកវិទ្យាសព្វថ្ងៃនេះ?
ដោយ​ ៖ សុវណ្ណរតនៈ | 9 ខែមុន SHARE

 

បច្ចុប្បន្ននេះ AI គឺជាប្រធានបទដ៏ក្តៅគគុកមួយ ដែលមនុស្សជាច្រើនជុំវិញសាកលលោក តែងតែលើកយកមកពិភាក្សាវែកញែក ព្រោះបើមើលទៅតាមការវិវត្តន៍ម្ដងមួយជំហានៗ ទាក់ទងនឹង AI សព្វថ្ងៃនេះ ធ្វើឲ្យគេជឿជាក់ថា វានឹងជះឥទ្ធិពលកាន់តែខ្លាំង មកលើការរស់នៅរបស់មនុស្ស នាពេលអនាគត។ ដូច្នេះហើយ នៅក្នុងពេលនេះ យើងនឹងលើកយកប្រធានបទ AI មកបង្ហាញដល់ប្រិយមិត្តទាំងអស់គ្នា ឲ្យកាន់តែជ្រាបច្បាស់បន្ថែមទៀតថា តើអ្វីទៅជា AI ហើយតើវាមានឥទ្ធិលអ្វីខ្លះ នៅលើវិស័យបច្ចេកវិទ្យាសព្វថ្ងៃនេះ?

មិនខុសទេ ប្រិយមិត្តមួយចំនួនធំច្បាស់ជាធ្លាប់ឮពាក្យថា AI នេះហើយ ដោយវាមកពីពាក្យពេញថា Artificial Intelligence ឬអាចហៅបានថា “ប្រាជ្ញាសិប្បនិម្មិត” ហ្នឹងឯង។ ប្រាជ្ញាសិប្បនិម្មិត ឬ Artificial Intelligence គឺសំដៅទៅលើប្រាជ្ញារបស់ម៉ាស៊ីន ឬកុំព្យូទ័រ ត្រូវបានបង្កើតឡើង ដោយយកត្រាប់តាមប្រាជ្ញារបស់មនុស្ស ពោលគឺជា Program ឬ System មួយ ដែលមានសមត្ថភាពធ្វើឲ្យម៉ាស៊ីន មានរបៀបគិតបានដូចមនុស្ស ដើម្បីឲ្យវាអាចធ្វើការងារជាច្រើនបាន ដូចដែលប្រាជ្ញាមនុស្សធ្លាប់ធ្វើ មានន័យថា គេបង្កើតវាឡើង ដើម្បីជាដំណោះស្រាយ ទៅលើបញ្ហាមួយចំនួន ក៏ដូចជាដើម្បីឲ្យវាធ្វើកិច្ចការទាំងឡាយកន្លងមក ជំនួសមនុស្សវិញ។

មូលហេតុដែលអាចឲ្យ AI អាចគិតបានស្ទើរតែដូចមនុស្សនោះ គឺគេត្រូវការបញ្ចូលទិន្នន័យយ៉ាងច្រើនបំផុត តាមដែលអាចធ្វើបានឲ្យទៅ Program នេះ ដើម្បីឲ្យវាអាចសិក្សាទៅតាមលំនាំនៃទិន្នន័យ ដែលទទួលបានទាំងនោះ និងផ្តល់លទ្ធផលមកវិញ ទៅតាមការចង់បានរបស់មនុស្ស ជាក់ស្ដែងដូចជា ការព្យាករណ៍អ្វីមួយទុកជាមុន ក៏ដូចជាស្វែងរកដំណោះស្រាយណាមួយ ដូចមនុស្សអញ្ចឹងដែរ ប៉ុន្តែវាអាចធ្វើបានរហ័សជាង និងត្រឹមត្រូវជាងទៀតផង។

អ្វីដែលធ្វើឲ្យប្រាជ្ញាសិប្បនិមិ្មតនេះ កាន់តែមានលក្ខណៈដូចប្រាជ្ញារបស់មនុស្សទៀតនោះ គឺថាវាមានសមត្ថភាពអាចរៀន និងបង្កើនសមត្ថភាពដោយខ្លួនឯង ទៅតាមទិន្នន័យថ្មីៗ ដែលវាទទួលបាន, វាអាចសម្រេចចិត្តលើអ្វីមួយ ដោយផ្អែកលើហេតុផល (វាវិភាគស្វែងរកជម្រើសប្រសើរបំផុត អាស្រ័យទៅតាមទិន្នន័យដែលទទួលបាន), វាមានការយល់ឃើញផ្ទាល់ខ្លួន ក៏ដូចជាមានការច្នៃប្រឌិតជាដើម ដែលទាំងនេះសុទ្ធតែជាចំណុច ដែលអាចកើតឡើងបាន តែលើប្រាជ្ញារបស់មនុស្សប៉ុណ្ណោះ។ យ៉ាងណាក៏ដោយ នៅមានចំណុចស៊ីជម្រៅជាច្រើនទៀត ទាក់ទងនឹងប្រាជ្ញាសិប្បនិម្មិត ឬ AI ប៉ុន្តែយើងនឹងមិននិយាយទៅដល់នោះទេ ហើយអ្វីដែលយើងចង់សង្កត់ធ្ងន់បន្ថែម ក្នុងពេលនេះគឺថា AI ត្រូវបានគេបែងចែកជា 3 ធំៗទៀត ដែលមានដូចជា៖

  1.Artificial Narrow Intelligence (ANI): ជា AI កម្រិតស្រាល ដែលអាចធ្វើការបានទៅលើកិច្ចការទាំងឡាយណា ដែលមានលក្ខណៈច្បាស់លាស់លើភារកិច្ចតែមួយគត់ ទៅតាមការសរសេរ Program របស់មនុស្ស ហើយក៏ជាប្រភេទ AI ដែលកំពុងតែត្រូវបានប្រើប្រាស់ ដោយក្រុមហ៊ុនជាច្រើនលើពិភពលោក នាពេលបច្ចុប្បន្ននេះដែរ។

  2.Artificial General Intelligence (AGI): ជា AI កម្រិតខ្ពស់ ស្ទើរតែដូចមនុស្សទាំងស្រុង ដោយវាមានសមត្ថភាពទៅលើការគិត, អាចបង្ហាញការយល់ឃើញផ្ទាល់ខ្លួន, ការស្វែងយល់ និងមុខងារជាច្រើនទៀត ដូចដែលប្រាជ្ញាមនុស្សអាចធ្វើបានអញ្ចឹង។ ដំណាក់កាលនេះ AI ក៏អាចធ្វើការបង្កើនសមត្ថភាពខ្លួនវា បានកាន់តែច្រើនផ្នែកដោយឯករាជ្យតែម្ដង ហើយក៏អាចធ្វើការលើភារកិច្ចជាច្រើនផ្នែកដែរ ប៉ុន្តែបច្ចុប្បន្ន AI កម្រិតនេះ គឺកំពុងតែស្ថិតក្នុងការសិក្សាស្រាវជ្រាវនៅឡើយ។

  3.ចុងក្រោយគឺ Artificial Superintelligence (ASI): ជា AI ស្ថិតនៅកម្រិតកាន់តែខ្ពស់ជាង AGI ទៅទៀត ហើយដំណាក់កាលនេះ សមត្ថភាពនៃប្រាជ្ញារបស់វា ក៏ខ្ពស់ជាងប្រាជ្ញារបស់មនុស្សថែមទៀតផង លើសពីនេះទៀត ASI ជាដំណាក់កាលមួយ ដែល AI អាចគ្រប់គ្រងខ្លួនឯងបាន, ការគិតកាន់តែមានកម្រិតខ្ពស់, អាចធ្វើការវិនិច្ឆ័យបានដោយខ្លួនឯង, អាចរៀបចំផែនការ ក៏ដូចជាអាចធ្វើការទំនាក់ទំនង ទៅកាន់មនុស្ស ឬ AI ផ្សេងទៀត បានដោយខ្លួនឯងផងដែរ។ យ៉ាងណាក៏ដោយ AI កម្រិតនេះ គឺមិនងាយនឹងកើតឡើង នាពេលឆាប់ៗខាងមុខនេះនោះទេ។

ពិតណាស់សព្វថ្ងៃនេះ AI ដែលយើងតែងតែឃើញនៅលើផលិតជាច្រើន ទាក់ទងនឹងបច្ចេកវិទ្យាសំខាន់ៗ ដែលមានលក្ខណៈឆ្លាតវៃនោះ គឺស្ថិតក្នុងដំណាក់កាល Artificial Narrow Intelligence (ANI) ប៉ុណ្ណោះ ដែលឧទាហរណ៍ជាក់ស្ដែងដូចជា៖

    • ជំនួយការសម្លេង នៅលើឧបករណ៍ឆ្លាតវៃ: ជំនួយការសម្លេង ដែលយើងប្រើប្រាស់សព្វថ្ងៃនេះ គឺផ្អែកលើ AI ហ្នឹងឯង (Google Assistant, Siri, Alexa, Bixby...) ដើម្បីឲ្យវាមានសមត្ថភាព ក្នុងការកំណត់ចំណាំ និងឆ្លើយតបមកវិញ ទៅតាមសម្លេងដែលយើងនិយាយទៅកាន់ឧបករណ៍ទាំងនោះ ដូចជាលើទូរសព្ទឆ្លាតជាដើម ប៉ុន្តែយ៉ាងណាវាអាចឆ្លើយតបបាន តែទៅលើសំនួរបែបសាមញ្ញៗប៉ុណ្ណោះ។

    • រថយន្តបើកបរដោយស្វ័យប្រវត្តិ: មិនខុសគ្នាទេ AI ដែលប្រើរថយន្តបើកបរដោយស្វ័យប្រវត្តិ ក៏ជា AI កម្រិតស្រាលដែរ ដោយវាត្រូវការកុំព្យូទ័រគណនា លើព័ត៌មានបានមកពីកាមេរ៉ា ឬសេនស័រផ្សេងៗ ដែលបានធ្វើការតាមដាន ឬកំណត់ចំណាំ នូវស្លាកសញ្ញាចរាចរណ៍, ភ្លើងសញ្ញាចរាចរណ៍, មនុស្ស ក៏ដូចជា Object ផ្សេងៗដែលនៅតាមដងផ្លូវ ហើយអាចធ្វើការបើកបរខ្លួនឯងបាន ដោយអាស្រ័យទៅតាម ទិន្នន័យដែលទទួលបានពីការតាមដានទាំងនោះ។

    • បណ្ដាញសង្គម និងកម្មវិធីមួយចំនួន: ដូច Facebook ជាដើម ដែលបានប្រើប្រាស់ AI ដើម្បីកំណត់ចំណាំនូវមុខអ្នកប្រើប្រាស់ ដូច្នេះនៅពេលអ្នកធ្វើការបង្ហោះរូបភាព ដែលមានមុខមិត្តភក្តិអ្នកដែរនោះ វានឹងនឹងបង្ហាញប្រអប់មួយ នៅលើមុខនោះ ហើយធ្វើការណែនាំអ្នកឲ្យ Tag ទៅកាន់បុគ្គលម្នាក់នោះផងដែរ។ សម្រាប់កម្មវិធីមួយចំនួនផ្សេងៗទៀត ដូចជា Netflix ឬ YouTube ជាដើម ដោយបានប្រើ AI ដើម្បីបង្ហាញវីដេអូ ឬភាពយន្តជាច្រើននៅទំព័រមុខ សម្រាប់ណែនាំអ្នកឲ្យចុចមើល ហើយភាគច្រើនវាសុទ្ធតែជាប្រភេទវីដេអូ ឬភាពយន្ត ដែលអ្នកចូលចិត្តតែម្ដង ព្រោះថាភាពយន្ត ឬវីដេអូ ដែល AI បានណែនាំនោះ គឺវាអាស្រ័យទៅលើទិន្នន័យ នៃប្រភេទភាពយន្តភាគច្រើន ដែលអ្នកធ្លាប់ និងឧស្សាហ៍មើលកន្លងមកហ្នឹងឯង។

    • ក្រៅពីនេះ យើងក៏ឃើញមានមនុស្សយន្តឆ្លាតវៃជាច្រើនដែរ ដែលសុទ្ធតែពឹងផ្អែកលើ AI ជាក់ស្ដែងដូចជា មនុស្សយន្តរបស់ក្រុមហ៊ុន Boston Dynamics ដែលបានបង្ហាញកាលពីពេលថ្មីៗនេះអញ្ចឹង ដោយវាសមត្ថភាពអាចធ្វើការរាំបានយ៉ាងព្រមគ្នា នឹងត្រូវទៅតាមចង្វាក់ភ្លេងទៀតផង។ មិនត្រឹមតែប៉ុណ្ណឹងទេ AI ត្រូវបានគេយកទៅប្រើប្រាស់លើផ្នែកជាច្រើនទៀត ទាក់ទងនឹងបច្ចេកវិទ្យាដែរ ជាក់ស្ដែងដូចជាកាមេរ៉ាទូរសព្ទឆ្លាត នាពេលបច្ចុប្បន្ននេះអញ្ចឹង ដោយសុទ្ធតែពឹងផ្អែកលើ AI ដើម្បីឲ្យវាធ្វើការបានកាន់តែប្រសើរជាងមុន ឧទាហរណ៍ដូចជា ការកំណត់សម្គាល់ Object ដោយស្វ័យប្រវត្តិ បានកាន់តែលឿន និងត្រឹមត្រូវជាងមុនជាដើម។

អញ្ចឹងហើយ ខាងលើនេះជាចំណុចសំខាន់ៗមួយចំនួនទាក់ទងនឹង AI ដោយដំបូងគឺយើងបានបង្ហាញ ទាក់ទងនឹង អ្វីទៅជា AI, បន្ទាប់ទៀតគឺបង្ហាញទាក់ទងនឹង ប្រភេទរបស់ AI ក៏ដូចជាដំណាក់កាល AI ដែលកំពុងតែប្រើប្រាស់បច្ចុប្បន្ន និងចុងក្រោយគឺជា អត្ថប្រយោជន៍របស់ AI ដែលត្រូវបានគេយកទៅប្រើប្រាស់ ដើម្បីធ្វើឲ្យវិស័យបច្ចេកវិទ្យា កាន់តែប្រសើរថែមទៀត។ សូមបញ្ជាក់ម្ដងទៀតថា ការរៀបរាប់ខាងលើ មិនទាន់ដល់ដំណាក់កាលស៊ីជម្រើសរបស់ AI នៅឡើយទេ មួយវិញទៀតនោះ AI ក៏មិនមែនត្រូវបានប្រើប្រាស់ តែក្នុងវិស័យបច្ចេកវិទ្យាមួយនោះដែរ ជាក់ស្ដែងវាត្រូវបាន គេប្រើស្ទើរគ្រប់វិស័យតែម្ដង ដែលរួមមានទាំង វិស័យធនាគារ ក៏ដូចជានៅក្នុងការសិក្សាស្រាវជ្រាវផ្សេងៗជាដើម។

ប្រភព ៖ Cambo Report
អត្ថបទទាក់ទង